ටැල්ක් පිළිකා නඩු විසඳීම සඳහා Johnson & Johnson ඩොලර් බිලියන 5.5 ක් ගෙවීමට එකඟ වෙයි

ජොන්සන් ඇන්ඩ් ජොන්සන් (Johnson & Johnson - J&J) සමාගම විසින් නිෂ්පාදනය කර පසුව වෙළඳපොළෙන් ඉවත් කරගන්නා ලද ටැල්ක් (talc) පදනම් කරගත් බේබි පවුඩර් භාවිත කිරීම නිසා ඩිම්බකෝෂ පිළිකා (ovarian cancer) ඇති වූ බවට චෝදනා කරමින් එක්සත් ජනපදයේ පවරා තිබූ දහස් සංඛ්‍යාත නඩු විසඳීම සඳහා ඇමරිකානු ඩොලර් බිලියන 5.5 ක් ගෙවීමට එම සමාගම එකඟ වී තිබේ.

මෙම සමාගම නිවේදනය කළේ, එක්සත් ජනපද ෆෙඩරල් සහ ප්‍රාන්ත අධිකරණවල පවතින නඩු 69,000 ක් පමණ මෙයට ඇතුළත් වන අතර, එය එම රටේ ටැල්ක් සම්බන්ධයෙන් පවතින නඩුවලින් සියයට 99.75 ක් නියෝජනය කරන බවයි.

ඒ අනුව ප්‍රාන්ත හෝ ෆෙඩරල් අධිකරණවල සිටින නඩු පවරන්නන්ගෙන් සියයට 95 ක් මෙම එකඟතාව පිළිගතහොත් පමණක් මෙම එකඟතාව අවසන් වනු ඇති.

ටැල්ක් යනු මෘදු ඛනිජයක් වන අතර, එය මීට පෙර ආලේපන (cosmetics) සහ බේබි පවුඩර් සඳහා ප්‍රධාන අමුද්‍රව්‍යයක් ලෙස භාවිත කරන ලදී.

නමුත් එහි පිළිකා ඇති කිරීමේ අවදානම පිළිබඳ සැකයන් මතුවීමත් සමඟ එහි භාවිතය අඩු විය.

2024 දී ලෝක සෞඛ්‍ය සංවිධානය විසින් ටැල්ක් "මිනිසුන්ට පිළිකා ඇති කළ හැකි ද්‍රව්‍යයක් විය හැකිය" (probably carcinogenic to humans) ලෙස වර්ගීකරණය කරන ලදී.

ටැල්ක් මගින් පිළිකා ඇති වන බවට කිසිදු සාක්ෂියක් නොමැති බව J&J සමාගම දිගින් දිගටම ප්‍රකාශ කළද, ඔවුන් 2020 දී එක්සත් ජනපදයේ සහ 2023 දී ලොව පුරා ටැල්ක් පදනම් කරගත් බේබි පවුඩර් අලෙවිය නතර කළේය.

2016 දී, එක්සත් ජනපද ජූරි සභාවක් විසින් ඩිම්බකෝෂ පිළිකාවෙන් මියගිය කාන්තාවකගේ පවුලට ඩොලර් මිලියන 72 ක් ගෙවන ලෙස J&J සමාගමට නියෝග කරන ලද අතර, එය මෙම ඛනිජය සම්බන්ධයෙන් එම රටේ වාර්තා වූ පළමු නඩුව විය.

වසරකට පසුව එම තීන්දුව අවලංගු කළද, එතැන් සිට සමාගමට එරෙහිව චෝදනා සහ නඩු වර්ධනය වූ අතර එක්සත් ජනපදය පුරා ජූරි සභා විසින් පැමිණිලිකරුවන්ට වන්දි නියම කරන ලදී.

J&J සමාගමේ නීතිමය ප්‍රධානී එරික් හාස් (Erik Haas) පැවසුවේ, මෙම එකඟතාව මගින් J&J සමාගමට "මෙම ගැටලුව නිරාකරණය කර ගැනීමට" අවස්ථාව ලැබෙන බවයි.

පැමිණිලිකරුවන් වෙනුවෙන් පෙනී සිටින නීතිඥයින් දශකයකට ආසන්න කාලයක් පැවැති අධිකරණ සටනකට ලැබුණු හොඳ විසඳුමක් ලෙස මෙම එකඟතාව සාදරයෙන් පිළිගත්හ.

කෙසේ වෙතත්, මෙම ගිවිසුම එක්සත් රාජධානියට (UK) අදාළ නොවන අතර, එහි 7,000 කට අධික පිරිසක් නියෝජනය වන පරිදි එක්සත් රාජධානියේ ඉතිහාසයේ විශාලතම නිෂ්පාදන වගකීම් නඩුව විභාග වෙමින් පවතී.

2025 ඔක්තෝබර් මාසයේදී පවරන ලද මෙම එක්සත් රාජධානියේ නඩුවෙන් චෝදනා කරන්නේ, තමන්ගේ ටැල්ක් නිෂ්පාදන මගින් පිළිකා (ප්‍රධාන වශයෙන් ඩිම්බකෝෂ පිළිකා සහ mesothelioma) ඇති විය හැකි බව J&J සමාගම දැන සිටියද නිෂ්පාදනය අලෙවි කිරීම දිගටම කරගෙන ගිය බවයි. සමාගම එම චෝදනාව ද ප්‍රතික්ෂේප කරයි.

මෙම නඩුව මේ වන විට එක්සත් රාජධානියේ මහා අධිකරණය (UK High Court) හමුවේ විභාග වේ.